上星期講開秘書妹妹翻煲嘅《洪武三十二》，燕王朱棣不滿侄仔皇帝朱允炆削藩，決定先發制人，發動靖難之變，兩叔侄打咗3年仗，朱棣終於登基做咗明成祖。朱棣自己擅長打仗之餘，佢嘅髮妻徐皇后都係巾幗不讓鬚眉嘅奇女子，只不過喺《洪武三十二》入面，徐皇后雖然賢慧，但戲份並唔突出。

徐皇后係明朝開國功臣徐達之女，嫁俾朱棣之後，跟住老公四處奔波、打仗，患難與共。喺朱棣發動靖難之變嗰陣，朱棣留低世子朱高熾守住北平，朱允炆手下大將李景隆趁機圍攻北平，想斷朱棣後路。就喺呢個關鍵時刻，徐皇后披上盔甲，親自登上城門指揮士兵、百姓作戰，成功守住北平。

就算做咗皇后，徐皇后成日勸朱棣實施仁政，等百姓可以修養生息。徐皇后自己賢淑不特止，亦經常告誡高官之妻，話做妻子嘅責任唔止係幫丈夫準備三餐、衣服，仲要對丈夫有幫助、須時刻心繫百姓。

徐皇后仁德、愛民，母儀天下嘅行為令佢獲得「仁孝皇后」嘅諡號。朱棣同徐皇后嘅感情深厚，徐皇后病逝之後，朱棣仲為佢喺北京建陵寢，宜家嘅長陵就係徐皇后長眠之地。

圖為朱棣、徐皇后畫像，原圖嚟自網絡。